換到特首,天下太平?

思言財
2016 年 11 月 02 日

作者:

文章短網址:

分享

筆者上星期同一班金融老死食晏。吹吹吓水又再講到近日政圈熱話特首「跑馬仔」。大家都覺得今屆特首選舉花生指數甚高。作為金融從業員,我哋梗係想揾個識得金融經濟而個人性格又開通嘅候選人做下屆特首啦!尤其係今年金融界普遍慘淡經營,有好多行家飯碗不保,成個社會又撕裂又寸步難行。再咁落去,成班老死都話唔換特首,肯定「冇運行,移民喇!」

所以一聽到hea咗十年嘅財爺"to run"呼聲愈嚟愈高,近日仲傳出金管局總裁陳德霖都有意想跑埋一份,咁未來5年仲唔係金融界嘅天下!?

但係諗深一層,大家嘅興奮其實只能夠好似觀眾睇好戲咁。場「跑馬仔」大家全部冇份落注,因為成班老死雖然個個位高權重,但都唔係銀行大班或者經紀行老闆,連代表金融界同金融服務界嘅選委競選都冇份投票。若果最後財爺真係有「習大大」祝福做到特首,佢點都只係由1200人嘅選舉委員會選出嚟,咁究竟到時佢係同「習大大」、選委會、定同香港市民交代呢?

呢個問題一眾金融人當然都啞口無言,事關大家都知道而家個制度係畸形嘅,特首只係由千二人選出嚟,有冇需要同全香港七百萬市民交代呢?

其他文章:胡官出選特首是北京加強操控的部署(黎廣德)

其他文章:責無旁貸?一派胡言!(曾偉強)

其他文章:胡官的顛覆 掩護的法則(王慧麟)

其他文章:左派信胡官非真命天子 商界望曾俊華盡快表態(李先知)

其他文章:誰擔保不是第二個梁振英?(秋平)

其他文章:香港需要一個怎樣的下屆特首(劉夢熊)

筆者只係擔心,若然「習大大」最後真係慈悲為懷,俾金融人至愛財爺坐正,香港人會唔會就咁收貨,以為自此會天下太平?

下星期若Donald Trump 爆冷當選,美股可能會跌一輪,但係各金融才俊會唔會從此唔買美股美債呢?

美國有嘅係完善嘅制度,所以衰完可以彈返起身。至於香港,政治制度一日唔改革,唔能夠真正還政於民,邊個做特首最後都可能由當初嘅萬千寵愛變成千夫所指。所以各位金融才俊,千祈咪以為財爺坐正就乜都搞掂,又可以繼續做番個「離地政治盲」。香港冇一個真正公平嘅普選制度,到最後大家可能都只有無奈講句:「冇運行,移民喇!」

文:阿灰@思言財雋

facebook專頁 Email: civilrenaissance@gmail.com