今日拆我屋,明日拆你局

我知道市建局呢隻大怪獸,已悄悄地研究攪緊油麻地旺角嘅舊區,一個我住左十幾年嘅好地方。

依家香港住屋問題,經過曾蔭權梁振英嘅玩法,可以話已經係去到人道災難級數,根本唔係要諗人人住豪宅嘅問題,而係你唔好攪啲舊樓等佢唔好再瘋狂起租,留番啲中下層生存空間透透氣。

但你個市建局就倒行逆施,開始又要向旺角油麻地啲舊區開刀,30年樓齡就當佢舊樓研究點重建,韋志成你係咪有病呀? 你會唔會太貪得無厭? 根本你就係想造大條數話有嚴重赤字,然後就合理化市建局賺到盡揸乾舊區嘅行徑,你以為你啲低級財技普通市民睇唔出?

市建局言詞間仲成日暗示香港人仇富,話市民成日話市建局益發展商,其實講到唔勾結佢地去幫手唔得架,實際上依家市建局根本就係「仇窮」,唔抵得啲低下層唔駛交稅$5000就可以租住市區套房咁開心,未來一定要迫到你$10000先可以0係市區租到劏房,令到你班窮人交番「合理」嘅租金,趕到你入窮巷。

大家可以冇留意到,今次要開展既旺角油麻地地區重建研究,可以話係一個全面嘅市區窮人大清洗計劃,會研究送好多新既特惠畀發展商 (如地積轉移),「鼓勵」佢地拆哂依家好多中下階層住緊嘅舊樓起豪宅,你揸取嘅就係香港普羅市民既血汗錢同生活空間,公屋條隊愈黎愈長就係你隊出黎,加劇住屋問題市建局責無旁貸。

其實一個現今解決人道住屋災難嘅方法,就係發起一場城市運動,目標係執Q左市建局呢隻周圍搶地起豪宅既大怪獸,買唔起樓嘅窮人先留有一片棲息之地,令人唔好再跌入市建局改善居住環境,提昇生活質素嘅修辭,根本佢喺度打劫緊我地嘅城市、拆哂我地嘅歷史文化同生存空間。

虛偽、無恥,願我有生之年可以見到市建局執笠的一天。作為旺角居民,我已經畀市建局重建過一次,當時因冇乜準備而感到可惜,但唔會畀你重建我第二次。面臨市區生活空間的全面清場,小市民已經無處可避,唯有抵抗。

原文載於作者facebook