其實《蘭花劫》是真.幾好睇

利申,我已經唔知有幾多年無坐喺個電視前面睇CCTVB D劇。記得細個時,我是追TVB啲劇追到畀老豆拎住衣架打,足見到我是幾咁鐘意煲劇。至於點解會睇《蘭花劫》,很簡單就是因為我是「人棄我取」型的人。個個唔鐘意睇、我就偏要睇下佢有幾低清(即是「撒嬌」果啲我就一集都無睇…),結果挺意外,其實是幾好睇的啊。

根據Wiki,「此劇以民初上海法租界為故事背景,描述失散三姊妹間的恩仇愛恨,刻劃人性陰暗和善良的一面。當中環繞女子監獄的生活情節,使用位於香港中環已關閉的歷史建築域多利監獄作場景。(https://zh.wikipedia.org/zh-hk/%E8%98%AD%E8%8A%B1%E5%88%BC

簡單而言,我覺得可以當佢是「Prison Break 民初版」同埋「金枝慾孽」的Mix and Match,感覺上亦唔算是咩大製作。的確,TVB出品,有沙石就在所難免,當中劇情偶有犯駁或者一 啲智障行為就不在話下,雖然觀賞時覺得還好,但前十集睇時,都有不斷Fast Forward。但整體劇本寫得不錯,更加是咁多年以黎我願意坐喺電視面前有心機追睇最後幾集的一套劇。

其實,當我地成日話TVB智障時,但事實是當佢寫啲正常Level劇本、啲演員又是個個演技派(唔是絕世靚仔靚女果種)、再加上是低清的時候,大家就無晒追睇意慾,咁究竟又是咩現象?無怪乎TVB出啲劇本質素越嚟越無質架喎,原來塞一堆靚仔靚女就滿足到大家!至於低唔低清,唓~有大把舊戲都超低清添啦,是好戲的話你睇唔睇呀?我都有睇過《發條橙》啦,無人會介意佢超低清。《家有囍事》重播,你咪一樣照睇!(不過呢,公平點說,本身女子監獄個顏色就已經是陰陰沉沉,啲人啲衫又陰陰沉沉。如果TVB願意好似外國Prison Break咁做吓畫面調色,成件事會型好多。)

講到尾,而家的人睇乜都要快入局要Juicy要爆要重甜要重咸,睇劇又要靚人靚景乜乜乜,大佬唔好食咁多味精啦無益呀!其實諗清楚啲,究竟是TVB餵到我哋變成成舊飯咁呀、定是因為我哋本身就好想做舊飯?好嘢點解總是沉底?因為大家根本無個Capacity去承戴呀…

講返套劇,我個人比較鐘意劇本中人性的刻劃(都是人性的醜陋果啲啦)、三姊妹的愛與恨等、都甚有火花,反觀Prison Break部分就有不少智障劇情。但是蘇玉華飾的二家姐炎佩湖真係應該攞視后,皆因真係好正,大奸角一名,但是果種淡淡的(但深不見底的)奸,真係令人毛管豎呀!(套劇佢演得超超好,無Noise真係好可惜…反觀翠如BB果啲爛戲就大把Noise…呢啲咪就是劣幣驅逐良幣囉…)

呢套亦是田蕊妮從亞視轉投TVB的首劇。我其實第一次睇佢做劇集(足見我無睇TVB啲劇好耐),但在呢套劇已見到她演技出色。在劇中她一開始軟弱、之後以為自己有絕症、之後為妹妹頂罪要死刑、之後仲要做傻婆,她都叫我信服(雖然中間是咁做老好人同埋是咁做智障野要見個仔都令人相當滴汗…),即刻令我對她印象加分。至於唐寧嘛,我總是有少少睇唔慣佢做戲,整體都是睇樣~

最後,馬蹄露飾的女囚韓環都是一大亮點。需知她都唔是第一次做醜角,而且今次不單是醜、仲要潑辣添,但佢都揮灑自如、仲要有少少戲中戲扮下嘢、我覺得佢值得有個最佳女配角呀!佢有做獄警的李家鼎都十分之搶戲,睇佢哋都好開心!

總結,此劇看點包括:

  1. 可以睇番已過世的陳鴻烈(喂我真係覺得佢好型!)、魯芬同埋曾守明,都叫做回憶一下
  2. 睇主角們鬥戲都幾OK,劇本唔差,演技派是要支持一下
  3. 配角搶鏡、幾有戲份
  4. 低清咪低清囉,我驚你有牙~
  5. 睇唐寧BB凍齡樣
  6. 羅樂林又死啦要!(全盛時期的羅樂林究竟要死幾多次?)

文:殷琦