再談垃圾徵費:商業垃圾生產者的生產責任

垃圾徵費已於日前推出,雖然好明顯大家對於這個議題仍然是零關注,但我好肯肯定在兩年之後,當大家終於知道「Oh Shit!點解屋企扔垃圾要收錢」時,呢個議題就會真正引起關注(人就是咁,唔殺到埋身都唔知驚……環保亦就是這樣的一回事)。喺呢日嚟到之前,我就先同大家討論一個問題,就是源頭減廢的方法。

如果大家有睇過在下一篇有關個人源頭減廢方法(http://wp.me/p8iPwg-h4F)的文章,都至少會覺得我是會對自己生活中有環保要求的一個人。之但是我夠膽講,即使是有環保意識如我,對於不少垃圾的製造都是有一種「無乎」的無奈感。點解?

第一麻煩的,事實是即使我在生活中盡量環保,做哂我上篇文講的源頭減廢方法,最大的問題都是當我一出街如果要買日用品返屋企,根本是無可避免地會製造垃圾。例如我想買個意粉返屋企煮個飯仔,但一入超市,全部都是已經包裝好的食物,咁除非我連想食的野都唔煮啫,否則真係唔係樣樣野食/日用品都可以在街市買架,尤其是西式的食材就更難。所以,好明顯香港是由製造商到零售商、根本諗都無諗過「無包裝超市」呢個概念。例如外國,就有這種「無包裝超市」,客人要自攜容器買食物,那才有可能避免日用品的包裝垃圾。

我以我做例子吧,我在公司的早餐都是食那種穀類早餐,因為真係唔想日日買面包。但穀類早餐真是無「無包裝」的可能,所以我只好妥協了。另外,我個人超喜愛吃零食(雖然很不健康但我真係好愛……),如果有「無包裝」的零食買,我絕對唔介意自攜容器。咁究竟有無方法解決呢?

第二麻煩的,就是出街食飯時製造的垃圾。首先,這裡已假定我已節省掉紙餐墊、紙巾、吸管及廚餘,但難搞的是很多大型食店完全沒有「源頭減廢」的概念,結果還是會製造出一大堆膠杯/紙盒/膠盒等等。例如你去M記,如果要求用個人的容器去裝,根本就是有一種「阻住人做生意」的感覺,而前線員工亦完全無經驗去應付這類的客人,黑面之餘往往要出動經理級,真係搞到人紅都面哂,完全令人沒有想自攜容器的意欲。而大型食店更往往要求有QC而必須使用即棄物品(例如唔知點解一定要用佢隻膠杯裝汽水……),最後垃圾一係就歸在食店、一係就歸在市民身上。無論歸哪邊,都不是我想要的結果,我是希望「不要」有這件垃圾嘛!為什麼就是要逼我呢?

所以,從積極方面建議,在大型零售商方面,可考慮在大型分店設「無包裝區」;另外,一啲做開食物處理方面的NGO都可以考慮成立「無包裝超市」的社企,嘗試小本方式經營「無包裝超市」,咁大家就有可能做得到減少垃圾。至少咁樣可以facilitate到市民「嘗試」減少垃圾。

而大型食店則要解決QC的問題,即是如何在自攜容器的同時,同樣確保產品質素。又或者索性講到明,如果自攜容器,就必須自行確保清潔,否則有咩痾嘔肚痛恕不負責。然後大型食店在前線員工的訓練中,必須要有「如何幫助自備容器顧客購物」的指引,讓員工熟習相關流程,以方便顧客自攜容器。零售商和食店甚至需要設立一些經濟誘因去加強顧客自攜容器的意欲,例如「可以排條短啲的隊」、「自攜容器」有折頭、或者會多給一點食物份量等等,都能夠讓顧客真實地感受到大型商戶落地實行環保的決心。整日在強調自己做好什麼回收,哂氣啦,一來是唔會做好,二來3R中,最頭果個是叫Reduce、唔是Recycle呀。

不過呢,到現時為止,呢啲都是妄想嚟。對住呢個跛腳鴨政府,佢唔令香港踏到陸沉都算萬幸啦,仲有更唔好話上面的建議會得罪幾多既得利益者。唉,人就是咁,自私自利,他朝一日,當我地令環境惡果殺到埋身,然後被下一代問「點解你哋搞到個地球咁差嘅」,我還真的覺得無言而對了。

文:殷琦