勇武抗爭的精神

東方球隊的不敗身被南區打破,網上居然不見有人提及,先前港中大戰時果種支持本地波的熱情,連百分一都無。

撐港隊,唔係諗住細水長流,而係好似燒煙花咁,又點幫到本地球壇一步步健康發展?球壇欠蓬勃,點出產好球員?無好球員,港隊點會有突破,又再吸引更多人支持,做成良性循環?果D因為撐港隊而曾經感自豪的人,點樣睇番成件事?撐本土,很容易講,但有幾多人認真諗過,所謂身土不二,除了在網上糾眾呼籲人劃地自限,防止溝淡,或在現實世界向唔順眼的外人發洩不滿,表達對中共和689的極度憎恨外,仲點樣可以做D野,對本土的維護和發展有更實質更具體的貢獻?

好似反高鐵咁,實在不分左右,都應該全力反對。勇武派唔妥呢壇野一直由「左膠」主導,咁完全係可以另起爐灶,各有各做喎,仲可以借機會比拚大家的戰鬥力和動員力。梁天琦有6萬幾票支持,呢D係生力軍,而且仲係武力抗爭的支持者,只要有十分一人走上街頭,用佢地認為最有效的抗爭方式挑戰689,絕對有力脅迫政府唔好再亂黎。咁一方面真正阻止中港融合的大陰謀(呢個是本土派的宏願),一方面仲可以履行「實踐是檢驗真理的唯一標準」原則,徹底收晒「左膠」的皮。究竟基於乜野,係咁重要關頭都唔將行動升級,仲停留在網上聲討和圍爐取暖的階段呢?

「左膠」奉行和平非暴力抗爭,預左最終被抬走,預左明知不可為而為之,妳/你笑佢地逢戰必敗,實在是忽略了人地有另外的戰略目標。妳/你用自己的目標去判斷人地的得失,係好奇怪的事,點解唔係用自己的目標先去評價自己陣營的成績呢?奉行勇武,好應該以行動去折服人,證明自己果套至係堅,家陣係笑完人地無料到,或者講番「左膠」過去有幾不濟幾PK,就當做左野,交足貨。在明眼人口中,咁只係用轉移視線的伎倆,來掩飾自己空口講白話。成件事就變得好荒謬,肯拋個身出來對抗政府者,被人諸多挑剔,明哲保身者,反而因為少做少錯,唔做唔錯,仲可以佔據道德高地指點江山。呢個現象只會令越來越多有行動力的人洩氣,咁仲點抗爭呢?

最好笑是有評論話選到梁天琦入去都改變唔到大局,但意義不凡,支持者的心態會好唔同,至少帶畀人希望。大佬,我都知有時政治既野都係講買個希望姐,但家陣最需要的係行動升級喎,「左膠」做唔到野,勇武派接手去做,做出成績黎,幾型先?你將個討論spin去講有更多本土派做立法會議員就好喇,係咪意味講咁多都係假,勇武派只係要奪權,踢走晒泛民,然後走番泛民舊路,到時到候搞下公式化勇武抗爭就當交足功課?一般人都係鍾意揀D本小利大的野來做,但我想講咁係違反勇武抗爭的精神架,勇武抗爭係要迎難而上架嘛,在網上搞咁多大龍鳳,最後都只係為左選舉,算點姐?

所以,支持武力抗爭者,好似各大學學生會,是時候實踐妳/你地對勇武的堅持和委身了。證明自己唔係人云亦云,咁就好應該從長計議,集合自己組織內的人力物力,設法搞一次大型抗爭,唔駛理D「左膠」,再和尋求司法覆核的反建制派議員裡應外合,力挽反高鐵的狂瀾。武力抗爭係殺手鐧,在重要關頭有機會施展出來,至稱得上有用,就好似一個國家的軍隊咁,如果危急關頭都無諗住用,或唔可能用,咁同一把曾經鋒利過但家陣生晒銹,唔睇得更加唔打得的劍有乜分別?咁係咪代表年初一的武力抗爭,實際上是陰差陽錯的結果,是一次唔會有下次的警民衝突?大家咁耐以來係咪都只是消費緊佢既光環,自high居多,極其量是等緊下一次唔知幾時再有亂局出現,趁機大搞一場,再用來延續呢個勇武抗爭的神話,幫助入主立法會的選情?

文:y.t.Chan

原文載於作者Facebook