史德威:基金經理修邊科?

資產管理公司的基金投資經理,坊間又叫「基金經理」「芬佬」是不少大學生或虎爸虎媽望子成龍的理想職業。唔少人都以為要做基金經理或投資分析員,大學理所當然要讀經濟學、金融財務、會計、工商管理等「搵錢」科目。但只要大家花少少時間上網搜尋一下,就會發現不少國際大型「金融財閥」的投資經理同分析員都並非主修「搵錢」學科。

小弟在一間基金公司工作,常要聯絡公司在英國同美國的基金經理同分析員,過去幾年發現一樣有趣的情況。美國同加拿大的投資分析部同事,大部份都讀上面提及的「搵錢」科目;不過英國及歐洲投資部同事就好唔同。細看他們的學歷,大學竟然主修香港人口中的「唔等使」學科,包括歷史、哲學、地質學、數學、物理等等。細問之下,原來他們認為投資金融財務分析只是職業技能,可以在基金公司邊做邊學,或者自己報讀特許金融分析師(CFA)等公開考試,所以他們會選擇其他學科去增加自己的視野,幫助自己在畢業後在就業市場中脫穎而出。

「唔等使」學科的優勢
基金公司為何聘請這些「唔等使」學科的畢業生呢?好簡單,投資公司本身可以提供金融財務知識的訓練,所以這些搵錢學科並不太值錢。相反,公司要一些具備不同技能和閱歷的學生作為新血,為公司帶來多元化才能。由於數學根底好,數學和物理畢業生在學習投資公司內計算投資回報及分析風險的量計模型 (Quantitative Model),都十分容易上手。持別係對沖基金公司如文藝復興科技公司,認為大學金融系所學的理論,根本不入流或者「學壞師」,所以寧願聘請精於數學、物理同統計學的畢業生,作為研究科學員,以發展公司本身的獨門投資分析模型。

至於當代歷史的畢業生,他們十分熟悉政制發展對社會及投資市場的影響,更勝讀經濟學、金融財務等學科的畢業生 。加上歷史係學生在大學讀書時,都習慣公開演說、辯論,同撰寫「選民大眾都理解」的文章,所以他們都精於將納悶同複雜的投資概念,講成生動活潑同動聽的投資故事,甚至上電視做秀。難怪英國老牌投資公司嘉誠資本(Cazenove Capital)旗下泛歐洲股票團隊的投資總監Julie Dean同基金經理Paul Marriage都係牛津大學當代歷史系畢業生。我相信係因為投資歐洲各地,須了解不同歐洲國家的近代經濟及政制發展,當代歷史畢業生就更有優勢。

舉多些例子。全球最大投資管理公司貝萊德(BlackRock)貝萊德農業基金,其基金經理Richard Davis就在愛爾蘭都柏林三一學院(Trinity College, Dublin)取得地質學學士,之後再從倫敦帝國學院(Imperial College)取得礦產資源勘查碩士學位。Richard加入投資界之前,在愛爾蘭當過三年地質學家,參與過唔少開採黄金、鑽石、基本金屬的項目。貝萊德應該是認為Richard在天然資源開採行業的經驗,有助了解天然資源公司的投資項目,並非他的財務知識。

唔想「倒模」要有膽色
如果各位虎爸虎媽,想莘莘學子日後在每年幾千個搵錢學科畢業生中脫穎而出,加入「金融財閥」揾錢(唔想同金融財閥為伍的讀者不用理我),現在不妨參考這些國際級投資公司高層人士的個人簡歷,然後選修一些所謂唔等使學科,練好英文同增加國際視野,先考上CFA第一級,或參加雷利計劃(Raleigh)海外義工等增加自已的閱歷;到畢業時自然跑贏那些人讀我讀的搵錢學科畢業生。近日香港有量計財務學畢業生走去做巴士司機同埋紮鐵, 為興趣之餘,我相信亦為他們注入與眾不同的工作經驗,加上紮鐵業中大學生奇貨可居,要升職到管理層,自然有優勢。

文章尾聲令我想起無線電視《天與地》電台唱片騎師Dr Dylan裡面所講:「我哋每個人都被環境訓練到,好似倒模出來」。我們上大學是否都要倒模地讀書?就算並非為做基金經理,為個人發展為貢獻香港,不妨考慮當代歷史、哲學、地質學、數學、物理等等學科,或者大學畢業後走去揸巴士、紮鐵或者行船?虎爸虎媽同準大學生,有如此膽色同視野嗎?

現題為評台編輯擬,原題:基金經理大學主修學科