如果3名特首候選人是3隻股票……

特首選戰繼續「雷聲大雨點小」。雖然我過往已表明對這「拆局」文化有保留,但我仍不時被人問我對局勢的看法。有見及此,我就化身為一個「股評人」,與「小投資者」把3名候選人當成為3隻股票去評論選戰。以下對話純粹虛構,大家千萬不要認真。

我:喂,你好。

聰:你好,我叫阿聰,個樣生得好似你㗎。想問下你最近有咩必賺嘅好介紹呀?

我:多謝你咁睇得起我啲眼光喎。有一隻580,佢好似又穩陣又係咁喺度升!

聰:580?乜唔係579咩?

我:係咁嘅,佢原本真係579,但係話改做580「老嚟」啲喎。

聰:原來係咁。點解你會介紹呢隻㗎?啲人話佢好衰㗎噃。聽聞佢個勢係造出嚟嘅,係靠有啲「大鱷」「谷」班馬仔係咁喺度「落飛」先至「谷」到咁「行」喎!係唔係真係有料到㗎?

我:嗱,「造市」呢味嘢好嚴重,我唔敢亂講,况且有「大鱷」出過嚟話一切都係謠言,就算喇。我睇到嘅,就淨係呢隻580做過好多唔同嘅範疇,樣樣嘢都好似識一啲咁樣,仲聽聞話背後有一些大老闆撐住,有人話佢個價位好有機會升到700左右,不過有人話佢個暗盤價淨係會少過689,甚至601喎。

聰:做過好多個範疇又點?又見唔到佢有啲好嘢做到出嚟喎,只見到佢有佢講,冇人講,完全唔理佢服務嘅客仔啲態度。如果佢狂升都淨係會益咗背後撐起佢嗰啲「大鱷」!

我:咁呀?你不如睇下隻165啦!佢做就做咗好多年㗎喇,不過好似到宜家都好似隻概念股咁樣。

聰:咁即係點?

我:即係佢好多人追捧,但佢始終都係講唔出佢嘅核心業務係乜囉。不過咁,雖然有好多「大孖沙」都好睇淡佢,市場人士多數話佢個價可能淨係徘徊喺300至400,同之前佢公布嗰個601目標價仲好遠。不過有啲風又話佢其實係得到班「大鱷」嘅「龍頭」支持,只不過係「龍頭」未開聲;如果佢話「落飛」嘅話,呢隻165會狂升至800至900喎!

聰:咁聽起嚟都好似值得一博,不過就好似好刺激,唔知個心頂唔頂得順。如果想睇隻冇咁「過山車」嘅有啲乜嘢揀?

我:不如試下睇睇隻180?佢係一家良心企業,不過冇乜人理佢嘅。但佢最近動作多多,周圍做投資者「路演」。如果「大鱷」嘅「龍頭」想喺個市度「食花生」、搞氣氛,話做180嘅策略投資者,咁隻股就可以狂升到601或以上。不過市場人士就覺得呢個可能性幾乎係零,仲覺得佢咁高調,最終個價會跌到得番幾十。

聰:你講呢3隻股,全部都好奇形怪狀,會唔會3隻個價都炒唔起㗎?

我:股市嘅嘢,乜都有可能!

聰:喂!同你傾3隻股,你都係話可升可跌;問會唔會全部都唔升,你又一句「有可能」就算。咁你即係講咗等於冇講啫。

我:聰哥,投資可升可跌嘛,係咁上下㗎喇,嗰啲喺出面講乜鬼特首選舉嘅「再世諸葛亮」咪又係喺度亂吹?如果我咁勁、眼光咁好,自己去炒股都發達啦,使鬼喺度同你傾咩!總之我就乜嘢可能性都已經包晒㗎喇,一定準,仲勁過啲風水大師!

(作者按:以上是筆者個人意見,不代表他所屬的律師行或團體)

文:任建峰

作者是執業律師

原文載於《明報》觀點版(2017年3月15日)