就係唔怕豬一般的隊友

香港近年廣為流傳的話「唔怕神一般的對手,最怕豬一樣的隊友」,意思指即使面對強勁的對手都不怕,唯獨怕身邊的同事好似「豬咁蠢」拖累自己,因為呢句說話好啱聽(英文:Music to ears),所以成為香港打工仔嘅流行用語。

但係如果大家用心睇過中國四大名著《西遊記》,就會發現豬一樣的同事兼老細,就如讒臣昏君,總有一個喺左近,而且係改變唔到嘅事實。與其成日諗住「唔怕神一般的對手,最怕豬一樣的隊友」(英文:With dumb friends like that, who needs enemies),自我感覺良好,不如學吓大陸版由張紀中執導嘅《西遊記》入面,孫悟空(由吳樾飾演)點樣幫助無能但有權(有金鋼圈)嘅老細唐玄奘(聶遠飾),如何分配工作畀好食懶做嘅豬八戒(臧金生飾)同蠢頭蠢腦嘅沙僧(徐錦江飾),提升整體戰鬥力到天竺取西經。

學懂行政管理軟實力嘅孫悟空

呢套《西遊記》喺2014年無綫電視由66集濃縮至45集,在平日晚上黃金時段播映,開始時不少網民不滿劇集的特技水平太低,劣評如潮。與無綫勢成水火的《蘋果日報》更乘勢追擊,在娛樂頭條直指無綫《西遊記》「太膠」,引起網民怒轟要求腰斬,更引述高登討論區、親子王國討論區及香港討論區網民意見,圍攻此劇。

此前飾演過孫悟空嘅張衛健以「型到跌渣」、「好玩到跌渣」、「畢巴你個隆地咚」等大受歡迎嘅口頭禪唔同;大陸版有好多與原著相同的細節,尤其係「好打得」嘅孫悟空,點樣由只會自顧自己「七十二變筋斗雲大鬧天宮」,變成喺自己打妖怪的同時,都會用軟實力要豬八戒同沙僧保護師父,以免中調虎離山之計;又學懂當遇到比自己更強的妖怪時,就去搵妖怪的老細收服佢地。

「豬隊友」 都可以大顯神威

面對咁多神一般嘅對手,身邊只有兩個豬一樣的隊友,加埋個只講不做嘅老細,孫悟空由一個自我自大只會打架嘅爛仔,變成會「搲爛塊面」虛心向觀音娘娘、太白金星等求教嘅管理行政人員,自己融會貫通,最後都排除萬難成功取得西經。

喺無綫電視播嘅大陸版《西遊記》中〈七絕山稀柿衢〉嗰集,講到由於通住七絕山嘅山路人跡罕至,山路塞滿了熟透而墮地嘅柿子,柿子腐爛,臭氣熏天,所以叫做「稀柿衢」,人馬都頂唔順。雖然孫悟空過到,但佢老細唐三藏就頂唔蒲,咁點算呢?唔通燒咗個樹林咩?好在已經成為行政管理級嘅孫悟空略施小計,叫村民整咗好多食物請唔怕臭嘅八戒吃,作為到「稀柿衢」開闢山路嘅酬勞,結果貪吃嘅豬八戒大顯神威,舉起九齒釘耙,喺稀柿衢拱出道來,人馬得以通行,等師徒四人便繼續趕路。呢啲咪將「豬一般的隊友」變成「神一般的兄弟」嘅行政管理本事囉。

只怕豬一般嘅自己

就如無綫電視安排過往曾參演歷代《西遊記》的演員拍攝導賞片段《西遊記.講呢啲》,提升收視,令《西遊記》收視穩步上揚,於2014年6月呢套「膠劇」尾段高見26點,平均收視點回升到22點,令不少網民大跌眼鏡。與其自我陶醉於「唔怕神一般的對手,最怕豬一樣的隊友」指摘隊友,倒不如諗吓點樣知人善用,同心協力,寬容相待,將各隊友的潛力發揮出嚟。不過咁,大陸版《西遊記》嘅內涵,你地識條鐵咩,大家都係睇返主打特技化妝,同埋啲口頭禪主打嘅劇集算罷啦。