最有志氣的小事

startup圈內,”being world’s number one” 呢句聽唔少,但對我黎講,以下呢句先叫有志氣

「希望engineer第一日返工可以做到1個commit」一間startup老細

嘩diu,何其有大志,無講笑,唔好睇少呢件小事,要達成並非易事(高登仔除外),即係叫個會計師第一日返工就開始計公司盆數,同時update落數簿。

要commit code(提交程式碼),首要嘅當然係毒L寫code;要毒L寫code,首先要明白而家嘅code做緊d乜。粗略計算,如果一間公司有10個毒L做同一個project,咁新入職嘅毒L就要「食」10個人嘅code,就好似高登音樂台集體創作咁,樓主寫「牟尼常歡笑,般若確係妙」,後面d人就要接住落去寫,愈遲加入嘅人,束縛愈大。正所謂前人種樹,後人乘涼,前人寫shit,後人食shit。就算你係天龍八部入面嘅掃地僧,識盡天下武功,係一堆shit code面前,都係無用武之地。

code靚都好,要食10條友寫嘅code喎大佬,1日點食呀?code以外,當然有人為因素。毒L雖然獨,但總有同事,同事幫唔幫到手就係其中一個要點,有人提點之下,快熟過快熟通心粉,hihi中伏機率亦都大大減低。講到呢一步,問題就黎:道理上,同事都係毒L,口齒不清,咁點算?答案其實都幾直觀,就係要想盡辦法令毒L脫毒。

靚code,helpful文化,唔毒嘅毒L,3者合1,first commit其實唔難。所謂first commit嘅要求,表面上係對新入職毒L嘅要求,實際上,卻是老細管理方式的自我要求。

好多公司,真係好多公司,第1日要員工set下電腦,聽下公司鴻圖大計、business concept,輕輕鬆鬆又放工,相比之下,first commit嘅目標係非常務實進取嘅想法。

有日,當公司增聘第100個毒L,而毒L喺第1日返工好輕易咁commit,呢間公司,我會落一個結論:不得鳥。

原文載於作者網誌