林勉一:劉皇發R.I.P.?

劉皇發死咗,我想提醒大家,如果你真係好懷念佢的話,先至好學啲傳媒咁講R.I.P.。

新界原居民當年六七暴動跟英國佬搵食,換取到丁屋特權。大家唔好以為丁屋政策係自古已來嘅嘢,實情係70年代先開始有。

英國佬俾著數就跟英國佬搵食對付左仔,中共嚟就跟中共搵食。你唔好以為丁屋只係新界佬自己土地起二千一百呎咁簡單,本來丁權係唔俾賣(即係套丁)俾發展商,結果就套丁成行成市。亦都因為利益龐大,當中涉及無數鄉黑勢力恐嚇、地政高官延後利益,幾多人搞到不能和平地生活,仲講rest in peace?

咁都唔止,而家政府土地儲備裡面,有成千公頃係預留做鄉郊式發展,即係丁屋。政府講唔夠地?要發展郊野公園?你又唔講呢成千公頃土地?

成個鄉事勢力咁惡,其中一個重要原因係佢地係一個利用制度坐擁龐大利益。劉皇發就係呢個集團嘅代表人物。一個劉皇發走咗,佢當然後繼有人,呢個尋租集團仍然會吔文吔武,繼續尋租。如果你覺得同佢有親,咁先好講R.I.P.,除非你係連詩雅,R.I.P.即是rest in piece*咁解。

*: Google一下「連詩雅+rest in piece」就會明