殷琦:書展的主題居然是旅遊 香港人知唔知個醜字點寫

今年書展,主題是旅遊。根據貿發局,「旅遊與閱讀同樣讓我們增廣見聞,但世界之大,我們未必能一一親身遊歷。閱讀不同的旅遊作品,讓我們有機會接觸到極地絕嶺,走過烽火大陸。通過這些作者的親身經歷及反覆沉澱雕琢而成的文字,不論是你我曾經遊歷過的國度,還是從未踏足的土地,都可以有一片不一樣的視野。」(http://hkbookfair.hktdc.com/tc/About-Book-Fair/Theme-Of-The-Year.html )

上年我是基於自己有書出所以去書展,今年(不在書展出會在年尾出吧?)因為不在書展出書,就更加去都唔想去,呢個題目簡直是將所有文化人、知識分子拒諸門外。我真係想講,貿發局你咪玩啦,你同香港人講旅遊?大家個腦咪就係諗到長 x 閃令令「食」「玩」「買」三隻字架咋!

我從不否認有深度旅遊這一回事,如果做到深度旅遊,了解各地生活文化(從而反思香港文化的衰落),此絕對是一件美事。但問題是香港人做唔做得到先?大部分香港人無深度係人都知架喎!香港人追求的,根本唔係深度,是「即食」、是「快」,如果旅遊書少梗D圖,都即刻俾人插,仲妄想咩「不一樣的視野」。好可惡,你借旅遊黎pub都算了,你明知香港人豬,所以專登用呢個主題呃香港人扮文青,其實根本搞cheap哂書展。難得用呢個主題,貿發局同香港人都覺得完全無問題,呢點我真係覺得好有問題,真係知唔知個醜字點寫。

我知書展淪陷真係唔係第一日的事,但是書展的功能本身,已是蕩然無存。打開一本書,本應是靜靜地、品嚐細閱好書、滿有文化氣息的一個地方,現淪為出版社的散貨場,讓人趁墟之地。尤其去到最後一日,有些書攤的書攤滿一地,好似去左街邊賣魚咁。我而家去左街市呀?!根本由頭到尾,連啲出版商自己都唔尊重文字。左邊高叫「3本7折」,右邊又散緊寫真集,跟住呢邊啲家長拖喼買習作,呢邊又喺度賣文具。呢啲叫深度?我真係想嘔呀!我問你呀,書展買咗嘅書,有幾多真係有睇?有用?如果你大部分買返去得個擺字,咁根本啲文字就無植入你的腦海中,買返去只是成為咗你的裝飾品,咁你只是中咗出版商同消費主義的詭計囉!簡直係浪費添呀!

忽發奇想,咁點樣先是一個完美的書展?對我而言,很簡單,好似誠品咁,Sell生活品味、Sell慢活又得。Sell人文科學、本土小說又得、Sell新晉作家亦得,其實已經好正。你班商人同我死開,還我正常書展!