殷琦:還我寧靜環境——論在公眾場所開擴音器

2017年七月一日除咗是回歸的「大日子」之外,相信大家認為更值得慶祝的,一定是便秘Jacky同埋營養師Diana的退役。我是對聲音異常敏感的人,事實上由細到大我一場演場會都無去過,最大的原因,就是我頂唔順太大聲的音響效果。如果不幸地踏進好大聲的Road show 車廂,又或者不幸有細路坐在附近,我真係會即刻走去另一層度。Roadshow終於壽終正寢,當真係拍爛手掌!

誰不知,當大家以為一個惡夢終於完結,但卻是另一個煉獄的開端。每日當你帶住半醒不遂的身軀,諗任入車度「恰」陣又好點都好啦,身邊居然有一個個不知好歹的人,很想同你分享佢玩手機打麻將又或者睇YouTube的喜悅,開大個喇叭喺度玩遊戲聽歌。其實呢個情況已經不止出現在車廂之中,更有蔓延至其他場合之勢,最常見就是餐廳之內,細路們大條道理地開住兒童節目睇。家長或工人姐姐們不僅不會阻止,更視之為終於令到佢安靜而自己可以爭取時間玩電話的一種手段,真係離哂大譜。更令我擔心的,是我仲發覺到會做呢件事的人遍及各個年齡層,當中以細路同長者最多。

嗱即是咁,長者不嬲喺社會都是打橫黎行都唔係第一日知,但勢估唔到怪獸家長都覺得全車廂的人都奉旨聽你個細路睇Pepper Pig,仲要較細佢少少聲就以為自己好有公德,我就真係理解唔到呢個是咩心態。根據康德嘅標準,自己覺得果樣野做得,你都要放諸四海皆準先得架喎。即係話,做人既野就唔好雙重標準,你既然覺得可以喺車廂開大喇叭,就即係話,你同樣要容許其他人可以咁做。嘩咁即係個個喺車廂開演唱會,你有你播歌我有我睇片咁樣啦,咁仲成世界?!

而且有D人望落正正常常乾乾淨淨,都居然會咁樣做。我真係唔敢想像,呢啲細路到左大個,就唔會覺得咁樣做有問題,咁到時個車廂可以開演唱會都得啦!我真係覺得這大概是回歸之後,又一在 「無公德」呢個議題上與摰愛袓國無縫接軌的一大證明。唔該如果你有啲公德意識,喺公眾場合,唔該你熄番電話個擴音器,如果唔係我一定會好似鄙視強國人一樣咁鄙視你!