韋健:CG動畫=賺錢?

韋健:CG動畫=賺錢?

前幾日「我有戲講」Tomc撰文談荷里活動畫,身為美帝動畫電影粉絲嘅我,見到有人大談呢啲極冷門嘅嘢,都幾開心。佢話嗰啲手繪動畫已經Game over,相對嚟講,「用電腦整既卡通片一直都係票房保證」。不過,係咪所有CG(電腦)動畫都可以印得到銀紙?對於佢嘅論述,我有一啲補充。

1. 「《魔雪奇緣》成功扑中市場」?

《魔雪奇緣》成功之處在於佢扮得唔似公主片。好多人都唔知,《魔雪奇緣》本來係傳統迪迪尼公主片,個市場本來得女性觀眾,只係迪迪尼將公主片做另類包裝,隱藏本來形象而已。〇九年,迪迪尼推出《公主與青蛙》,單睇個名,已經嚇走哂男性觀眾,結果只賺兩倍半,對比廿年前手繪動畫《美女與野獸》能夠製造十七倍銀紙,簡直差天共地。

2. 「夢工場一直都相當進取」?

我唔知「進取」嘅定義係乜,但係我知道如果一間動畫公司係咁將過去好收得嘅翻炒再翻炒,咁就唔係叫「進取」,而係保守。自從《馴龍記》之後,夢工場好似腦閉塞咁樣,唔係續集狂收錢,就係原創動畫慘淡收場。

齋睇夢工場動畫排行榜,頭十位來來去去都係《史力加》、《荒失失奇兵》,頭四名更係由前者包辦。另一方面,近年四部原創動畫,除咗《古魯家族》之外,其餘三部都仆直,結果造成天文數字上嘅減值,重要令到夢工場開始蝕錢兼要炒人,連累埋股價從今(一四)年初高位已經回落三成有多。

需減值的動畫及減值額(美元):

《五星大聯盟》(2012):1.65億

《極速Turbo》(2013):1350萬

《百寶狗先生與細蚊》(2014):5700萬

夢工場動畫嘅黃昏其實已經到咗。《馴龍記二》近排上映,佢一向被視為鹹魚翻生嘅關鍵,有網友指,若然繼續仆直,長遠來說會可能繼續蝕落去,最嚴重會執笠。小弟尚且買定花生,等睇好戲。

韋健:CG動畫=賺錢?

3. CG動畫一定係搖錢樹?

如果你覺得CG動畫一定係搖錢樹,我只能話「少年你太年輕了」。重記得有六部CG動畫响舊年暑假一齊嚟個「六國大封相」,你打我又打,我打你再打,如斯亂鬥場面,可謂前無古人。結果埋單計數,只得續集電影《怪獸大學》同《壞蛋獎門人二》順利贏出,《飛機總動員》因為成本低而不過不失,其餘就都輸得好甘。

無計嘅,CG動畫成本愈嚟愈貴,戲飛又愈嚟愈貴,無可能睇哂咁多片,有得揀都揀質素有保證嘅續集啦。雖然話六部可以回到本,但比著我,整續集收得好過原創,咁不如繼續玩續集玩落去。除非整到好似《無敵破壞王》嘅破格動畫,又或者好似《沖天救兵》可以涉及唔同年齡層,否則真係愈嚟愈難賺錢。CG動畫行業花生處處,不妨多留意一下。

原文載於作者網誌