馬傑偉:港女藥丸Post

facebook心理,變化微妙。我和世侄女早已睇post唔發post。以前,fb friends,都真係friend friend哋,今天fb好似個「公海」,乜人都有,你今日出咗兩粒暗瘡,唔會喺銅鑼灣Sogo十字路口,大大聲嗌「好痛啊!」但世侄女話我知,有一種「港女藥丸post」,當事人久唔久post張相,show幾包醫生開嘅藥丸袋,或一樽咳水,話:「又病喇,好辛苦!」然後下面一群朋友留言:「加油啊!」「好可憐啊!」「錫錫!」看官,你懂的!病人就是要朋友同情鼓勵。

我係男人,唔知女人心理。世侄女話,有些妙齡女人瘦身美圖,經營女神形象,亦愛收兵,明知唔會同班觀音兵拍拖,但暗示有可能發展,久不久「派軍糧」,即係合照一下、飲杯咖啡、post張卡娃兒照片,激勵一下軍心。

藥丸post係一種十分專門嘅genre,要病得慘情,給人有種頭暈身㷫的酥軟感,例如「低燒幾日都唔退,今日仲要present,點算呢……」聽世侄女說,見過一個「搬屋藥丸post」,效果立竿見影,女神搬屋先嚟病,下面留言群情洶湧,麻甩兵團,人人搬屋。

我發覺,藥丸並非港女獨享,男人也有呢鋪癮,有些「軟男」,也愛在facebook訴苦,話自己做得好辛苦,飯都唔得閒食,或給賤人陷害……下面留言,也是「加油啊!」「撐!」求仁得仁,眾親友打氣,當事人迎難而上,發憤做人。

原文載於《明報》時代版(2018年5月19日)