瘋狂寫臨時動議 都不及議會瘋狂

我有一個朋友,深夜閱讀益智讀物面書,深夜膠流又出現了!

「我想問下捲土重來的反高鐵嗰度呢,而家咪叫市民寫臨時動議,但陳鑑林是咪可以照剪布(我指市民寫個啲臨時動議)?」

「我完全唔知反高鐵咩事,我成個 FB 都無 share 反高鐵。」

「我都係咁啱睇到八鄉朱凱迪個 post,其他完全死寂。」

「哈哈我交咗 15 個動議。」

「泛民議員提出 1,262 項臨時動議。代主席陳鑑林今日向議員發出書面裁決,只批出 36 項動議。理論上,主席有權力剪哂。所以就係要大家發揮創意,寫多幾款,等佢唔會話啲動議重複、太似而剪走(有權力都要有一定合理性)。」

我心想,而家的權力有合理性咩?不過算啦,做得幾多得幾多,此時,有傻豬豬亂入。

「可以問乜都得?你今日食咗飯未?」

「呃……總之要同高鐵有少少關係。」

「鑑於高鐵總站營收對整項工程的投資回報有關鍵影響,本委員會促請政府交代高鐵總站人流數據。係咪太正經 LOL?」

「其實我想知高鐵男女廁比例?定冇分男女廁?」

「同埋民以食為天,我想知高鐵會否提供食物?」

「我想知高鐵會唔會送水,大陸車會送水。」

「同埋有服務員,高鐵的服務員是乜質素?」

「小明會唔會跑得快過高鐵?」

「會唔會搵李家仁唱小明坐高鐵?」

「以後高鐵意外係咪一定唔會死多過 35 人?」

「我想問下高鐵列車係咪應該有機打?」

「咦?好似要以建議形式寫喎!」

「咁建議高鐵加建遊戲機等車廂設施囉,雖然我懷疑你要認真諗嘅話,因為裝 game 同追加撥款(工程)冇乜關係,明顯會被 ban。不過有多冇少都好嘅。」

說時遲那時快,柏斯迪同朋友膠流完一晚,竟然被廢武功,一條 37A 都無用過,就被主席全剪,撥款通過……

世事如此多,柏斯迪很忙。