致建制選委們:萬事保重,雖四面受壓,別輕易屈服

一如所料,此刻的葉劉已進入爆seed狀態,地球人雖然已阻止唔到林鄭當選,但亦阻唔到葉劉爆 seed。

不少鄉紳聽完今早(編按:2月21日)葉劉在商台《881在晴朗的一天出發》訪問,左一句「有參選人依家唔係『三點不露』,係只露三點(政綱),係唔足夠架嘛」、右一句「唔通個個都嚟食殘廢餐咩?」都不約而同說,這是近年聽過的最爽的一個訪問。

漁人得利 奶媽笑到收唔到聲

筆者早前曾撰文提及(〈全城集氣,讓葉劉衝閘〉),從策略性來說應該送葉劉入閘,既幫鬍鬚助攻,又可鎅走奶媽票。可惜泛民選委們堅持要捧胡官入閘,大家可預料到的結果,是讓對手漁人得利。難怪有報章說近日奶媽趾高氣揚,梗係啦,咁多人話埋俾你地聽個遊戲點玩,都仲係要堅持自己人打自己人,畀著我係奶媽,都笑到收唔到聲啦。

假如今次選舉結果,係鬍鬚胡官奶媽三人入閘,而奶媽真係盡擸建制及部分專業界別票高票當選,上場後即時「689 2.0」現形的話,未知當初被寄予厚望的民主300+選委們,如何向選民交代?

不過,筆者是新界人,雖然堅決反對「689 2.0」上場,但始終心繫一眾相識的建制及鄉紳選委,如何在這場選戰風暴之中,安然而退。

大家都明白,作為建制派,很多時候都是身不由己,尤其在大是大非議題及重要投票時,站錯邊,便會萬劫不復。按照常理,今屆特首選舉局勢詭異,未到最後一刻,都未知邊個跑出,選委們應待至最後一刻才表態,或是像誠哥般超然,一早已表明不提名任何人,免得押錯注之餘,又樂得清靜。

無奈現實違反常理。自從奶媽宣佈參選後,各建制選委歸邊都歸唔切,提名期未過已西瓜靠大邊,在「核心」未表態、參選人又不得民心的情況下,為何建制選委們歸邊會如此迅速?唯一解釋,只有是霸王硬上弓。

3‧26 投票 記得戴手套

今屆西環直接干預選舉已是公開秘密,檯面牌以「奪命追魂call」攻勢攞盡提名票,檯底則以威嚇手段逼人就範。「燈神」蕭生的節目中(最新蕭析:https://www.youtube.com/watch?v=K5tTQRCQW7o) (time : 43″10 – 44″20 ),提到曾有建制選委向他透露,西環有人表示只需查核選票手指模、以落焊作記認等簡單「技巧」,已可知選委投票意向,就算投暗票也無所遁形。是否如此神通廣大?實在無從稽考,但已有一位鄉事選委說,早已聽過相關傳聞,打趣說「寧可信其有」,考慮呼籲建制及鄉事選委3‧26當日投票時戴上手套,以免被人追查到投票意向。

筆者聽到,感到無奈之餘,亦只能苦笑。同時亦在此向仍未表態或未作綑綁提名的建制選委們致意,你們正可能四面受壓,有口難言,但也希望你們明白,票投奶媽,只會選出一個利益集團。有骨氣的話,投票時就豁出去,選出一個真正屬於香港人,不會再令香港人想移民的特首。

有一位網民說得好:始終葉劉有母性,可以為個女去美國一齊讀書。林鄭只會在有利用價值時,才將老公仔仔放出來。

一個為了連做特首,連老公仔仔也可當成工具的女人,你信她會真心服務香港嗎?

文:王亞樵

作者簡介:新界居民,走訪大小村落,近年開始參與鄉郊事務。