2016膠之時事回顧

我有一個朋友,她和我一樣,都熱愛膠。一年將至,我們忍不住回顧全年時事,一開始只打算精選五單膠味濃郁的新聞,後來愈講愈興奮,順道推介膠之影片及人物,特意拋膠引膠,與大家分享。

(一)新聞

1月:銅鑼灣書店事件

「呢單新聞的膠點在於李波特別的自拍技巧。他每天都有新的自拍,證明自己『自由自在,沒有人干擾』。」

「仲要《星島》先有呢D自拍相咋,獨家啊,威啦。」

「《星島》特別的偶遇技巧都應記一功,得佢D記者先會在街頭遇上銅鑼灣書店銷案員工張志平,並成功游說他接受訪問。」

4月:亞視最後一夜

「從此不能再唱《亞視永恆》,哀。」

「亞視最後一幕係羅霖講『應該要獨立』,意味深遠⋯⋯」

「又,羅霖真係獨立,仲食埋小鮮肉。」

8月-11月:由DQ到人大釋法

「黨真係好努力,要令港獨在港如『過街老鼠、人人喊打』。」

「釋法呢家嘢,又係時候要唱《熱愛基本法》:以力勁保護它,多加一把~」

「其實琦仔是年度人物。唉,佢的政治壽命捱唔到下一個年初一,一個生肖都無,諗起都覺唏噓。」

「其實琦仔是香港人真正人辦,黨要點玩你就點玩你。琦仔都已經算是聰明嫁啦⋯⋯但黨最叻玩聰明人。」

9月:THREE C MEETING

「橫州呢單嘢⋯⋯就算連三司會直譯做THREE C MEETING都講得出,但學財爺話齋,You always agree with your boss啦。」

「But your boss seems to disagree with your resignation囉。」

「邊個boss先?」

12月:香港興建故宮博物館

「北京一個、台灣兩個,再加香港一個⋯⋯係咪要湊腳打麻將?」

「故宮可能是遷都的先兆霧霾太嚴重」

「遷來香港咩?」

「遷來香港有乜唔好?」

「有。遷都也不會益你港燦。同埋啊,故宮咁廢,遷都首要都唔係遷故宮。」

「咁係遷乜?」

「當然係天上人間啦!」

(二)影片:

1. 蔣麗芸和黃碧雲罵戰:「一個墟唔駛三個女人,有蔣麗芸同黃碧雲已經得。」

蔣麗芸:「請黃碧雲發言啦好嘛?你咁中意講嘢。」

黃碧雲:「痴線架你都。」

2. 蔣麗芸要鄭松泰望住佢發言:「好勇武的鄭松泰,怕嘅可能只係呢個女人。」

蔣麗芸:「鄭松泰議員,請你對住我講嘢吖。」

鄭松泰:「⋯⋯」

3. 梁君彥要楊岳橋坐低:「一個坐低咗嘅人究竟點樣可以再坐低呢?楊岳橋都問你唔到。」

梁君彥:「楊岳橋議員,請你坐低!」

楊岳橋:「我一直都坐低咗啊主席。」

(三)人物:

1. 時尚王:陳玉娥

「立法會選舉新東嗰邊的娥姐除咗同橋哥傳緋聞,仲係時尚王黎架,每當係夜晚的選舉論壇,佢就會打扮到好似一支花咁。」

2. 真相王:大陸朱

「立法會選舉九西嗰邊的大陸朱,金句連連,包括政治係老人玩嘅遊戲、毓民係香港最大嘅鬼⋯⋯」

「講開又講,其實我都有D擔心馬愉生,唔知佢同黃毓民反咗面未⋯⋯」

3. 尋人王:陳雲、《成報》

「先有陳雲以西瓜尋琦仔,後有《成報》說阿爺登報覓小明。《成報》的漢江泄更是智者,世事都被他看透了。」

(四)後話:

「一月時是想像不出有任何事誇得過李波,然後每個月都刷新下限咁。」

「家陣有乜係唔膠嫁請問?」

「膠but sad⋯⋯」