大陸消費唔掂?唔怕,有宅男經濟!

如果話賺女人錢好易,咁今次出完trip去上海之後,我會話男人錢都好易賺,仲要係宅男!做完野在上海stay behind玩半日,路經一個叫「SNH 48星夢劇院」的地方,好似油麻地的戲曲中心,是由舊劇院改成的表演場地。好奇走埋去,見到有一大批宅男等緊入場睇SHOW,個個都有一雙飢渴的眼神,好似一隻隻ZOMBIE咁,覺得恐怖之餘,仲心諗:咩料呀?原來,呢度係女子偶像團體SNH 48的基地。這隊由70幾個90後少女的中國版AKB 48,可以話抄足日本AKB 48,個個少女成員不單青春可人,仲東瀛味十足,一團女仔著住BIKINI又唱又跳,碧波蕩漾,當然殺死一眾宅男。(YOUTUBE:  https://www.youtube.com/watch?v=rJSjawMMxbs )這個星夢劇院差不多日日都有SHOW睇,由79個成員分小組演出,票價由企位80元人仔,至168元的VIP位都有,經常爆滿。仲要搞積分計劃,每場演出出積分最高的3名宅男可以作超近距離接觸,實行要全方位俘虜宅男的心!小妹在場當日下午剛剛沒有演出,但就有隊中最受歡迎的少女偶像生日會,宅男們可以用100元人仔買3張叫「出握手券」的飛,每張飛可以同其中一個少女握手10秒!!我睇見有十幾歲,乳臭未乾的少男來問價,一問之下明顯覺得貴,但最後仍掏出100大元,來與女神作肌膚之親!SNH 48吸金能力相當強,不單止在旁邊聚集一眾宅男的CAFÉ賣偶像紀念品,每年仲會搞最具人氣年度偶像,選票都要用錢買,仲要不受一人一票所限,有說有人已豪灑2萬元在女神身上,實行要將佢捧上天!去年收到的選票金額就有過千萬,今年選擇舉仲未結束,但選票金額已是去年的4倍,生意愈做愈大。小妹作為女性,當然對這班少女為之側目,仲要日本妹樣唱普通話歌,真心覺得難頂。但既然有一班宅男咁願意為女神洗錢,在大陸消費咁差之際,宅男經濟真係會殺出一條血路!歡迎like我個page一齊討論討論: www.facebook.com/financetung

詳情

揀股揀男人

自從四月開始,小妹便多了一個稱號──「人肉報價機」。無,話哂Charles呢個男人隨時有機會令小妹付託終身,早排眼見他的細價股每日十、二十個巴仙上落,基於「他的錢很有可能成為我的錢」的前提下,少不免經常於whatsapp追問他有何打算。話說有一次,Charles投資組合中的銀泰百貨(1833)由當初的$5買入價升到$8.5,升幅達七成多,我自然問他為何不趁高價賣掉。可能我太煩,Charles果然把手中的銀泰全數沽售,結果隻股票最高升至$17.09。我懷疑就係咁,Charles決定自此不再告訴投資組合中的任何股票。其實,我真係好鐘意同男人傾股票,不是想拎冧巴,而是如同「麻雀枱上見真章」,一個男人如何買賣股票,或多或少反映到他的性格。曾經見過不少男人專跟消息買股,人講佢又講,而基本上冇做任何功課。不難想像,這些人通常都是渴望發達,但又不願意付出努力。最初可能會賺一些,但更多是『坐艇』後怨天怨地怨朋友,但卻從來唔識檢討自己。當然,亦有不少男人手上來來去去都揸住公用股及大藍籌,跌5%都牙痛咁聲。這一類投資者性格上普遍都是追求穩定回報及較腳踏實地,但問題是,雖然他們不會輸大錢,但亦很難飛黃騰達。當然,最理想的一定是有膽色兼做足功課,並睇中高增長股的男人。不過正所謂「七分努力三分運氣」,有時你做足基本分析,但大市氣氛唔好,再有經驗的投資專家亦有可能蝕錢收場。這時,對投資者最大的考驗就是,你有沒有一套投資原則,並嚴格遵守。例如,如果你的投資以長線為主,只要公司的基本因素沒改變,在自身不缺現金流的情況下,理應無懼市場的短線波幅。又或者說,如果你的投資以短線為主,買入後發現情況不對時,你是否夠果斷手起刀落,因若然錯過了較佳的出貨時機,套得太深,就只能多熬幾個月甚至一整年,導致失去很多投資機會。投資市場生存,買賣的是股票,反映的卻是性格;賺定蝕都好,只要過程中有用腦,學到的東西最後都會落自己袋,為下次作出更好的準備。買股如是,做人也如是。當我將以上理論與Charles分享時,他卻回應話,其實最好的男人,是做足以上種種外,更不需讓女人的心情隨股價翻騰,這才是他不想再告訴我揸咩貨的真正原因。「總之我冇孖展,冇入新錢玩,對手中股票有信心,你亦不需要擔心。」這已經成為Charles的口頭禪。可能Charles講得啱。至少,於近排由28000點跌到落23000點的這場跌浪中,他仍舊笑容依然,我自然也不需要愁眉苦臉過日子。巴菲特說,一生最好的投資就是選對了老婆,倒過來也是。姊妹們,共勉之。歡迎like我個page一齊討論討論: www.facebook.com/financetung,圖片來源:Simon Cunningham@flickr 投資 愛情

詳情