陳澤滔:搞港獨?先搞清偽命題

?雨傘四大新興網上勢力,退聯、勇武、港獨、白票,講完退聯今次又講吓港獨派。其實我覺得呢個係幾吊詭嘅命題,因為會真係落手落腳去搞嘅,係唔會大鑼大鼓去講。而講果班呢?就一定唔會係出手去做果班。所以社會上就淨返一班齋talking 嘅港獨派去講港獨,而就會引嚟另一班唔支持港獨嘅人去鬧果班齋talking 得個講字。跟住又引發罵戰,呢條友又話果條友淨係識FF,果條友又話返呢條友係鬼係間諜。老實講雖然我唔太支持,但我對港獨唔反感。而且即使唔搞獨立,我地都要應該盡量去嘗試自給自足嘅。水又好,電又好,食物都好,要有自己嘅生產線,先唔會俾人擒住搶,先有討價還價嘅能力。但相對港獨,我更認同「中國衰,香港好;中國更衰,香港更好」。港獨唔係唔得,但企係中國隔離扮幫手而從中取利嘅利益更大。不過我唔係乜乜經濟學家、經濟學系教授,唔識計港獨令香港損失幾多千億,講利益呢方面就唔班門弄斧啦。但我覺得大家嚟嚟去去都係討論應唔應該獨立、有無能力獨立,結果就係不斷兜圈。一面就不斷講好多理由去支持獨立,另一就搵好多條件去否定獨立嘅可能,結果又係變罵戰。究竟係港獨撚離地呀,定係大中華膠賣港呢?我反而實際啲諗,如何安全地引發港獨呢?隔離一個「泱泱大國」,點樣令佢哋心甘情願,甚至係主動趕走香港?假如呢個問題答唔到,所有討論都係多餘嘅,只係紙上談兵嘅唧。以中國嘅軍事力量,香港全民當兵都唔會打得贏。所以只有中國自願趕走香港,港獨先有希望。而港獨撚就只會沉醉係同大陸切割,成日諗住思想上同大陸切割之後割割吓現實都會割埋。係咪真係會咁呢?我唔知,但暫時以我淺陋嘅智慧仲未諗到一個合邏輯嘅model 令成件事發生。如果大陸要主動放棄香港,第一件事係咪要香港乞共產黨憎先呢?共產黨其實真係唔太care 你冷處理六四,定反唔反蝗。係我眼中(當然我可能錯啦)共產黨只會care 兩樣嘢,就係錢同埋權。你有無能力令共產黨喺香港跌錢而又唔影響香港本土嘅人?定係我哋已經下定決心攬炒?如果有,我哋就有條件令大陸主動放棄香港啦。無咁嘅決心?咁我哋唯有由權力著手。係香港要點影響共產黨嘅管治先會令大陸寧願放我哋走呢?有人話喺香港奪回政府立法會。共產黨見你香港人竟然取得香港政府嘅控制權,所以寧願俾你獨立?好似唔係幾合邏輯囉。我諗到嘅原因只有一個,就係香港嘅存在直接影響到共產黨對全中國嘅管治,甚至如果繼續俾香港係中國入面係果令共產黨亡黨嘅,咁佢就會諗放棄香港啦。可以點做?傳入民主思想,支援大陸市民任何民主抗爭,只要我哋喺大陸辣得愈多火頭,共產黨就要正面面對香港問題。睇到呢度高登仔一定又屌啦:「DLLM 講到最後原來又係講建設民主中國!均鳩我睇呢篇咁嘅垃圾,作者都戇撚鳩嘅!」假如你睇完都係咁諗嘅,其實我唔會再有辦法說服你接受我嘅觀點。我只會話馬來西亞當年趕走咗新加坡,其中一個原因都係怕鬼咗李光耀影響政權。當然其實兩件事好難咁比較,而且背景內容都唔同,但個中心思想就係 – 你要搞鳩佢原本嘅政權。其實藏獨份子做嘅嘢差唔多喳,不過佢哋勇武,用威嚇。我哋香港人錫身,我哋用智慧。總知就係三個字,搞鳩佢。我真心希望港獨派不妨諗吓。原文刊於作者臉書,標題為編輯所擬。 港獨

詳情

陳澤滔:如果學聯真的由學生一人一票選出……

睇到周永康嘅status,突然又想講吓退聯。其實一直都唔太想講,因為家陣啲人好麻煩,一唔撐就話你左膠,講兩句唔啱聽嘅就唔會再講道理,甚至話你堅持講道理呢個行為本身已經係左膠。先旨聲明,我唔支持退聯,但我極贊成有多啲退聯嘅討論。真理愈辯愈明,而且學聯亦都要確實地面對學生嘅期望。能力愈大,責任愈大。因為大人嘅不濟,好不幸我哋將一個唔應該由學生負起嘅重擔放咗去學聯嘅同學仔上。我會覺得有時唔應該對佢哋太harsh,但正如佢哋所講,作為時代選中嘅年青人,佢哋亦都要誠實地面對佢哋嘅處境。因為懶,以下落嚟會用point form:1.唔好吓吓話人係鬼呢個對兩方支持者都係咁講,特別係支持學聯果邊。唔見得嗌退聯就係鬼,而無真憑實據之下更加唔好隨便話人係鬼。係有道理嘅,講道理咪得囉。咁多時間俾大家討論,何必搬一套只問立場嘅價值觀出嚟?2.學聯組成問題退聯組一直講嘅係學聯秘書處唔係由學生一人一票選出嚟,無資格代表學生。我先唔討論秘書處嘅代表其實嚟自學生一人一票嘅學生會,我講吓學聯如果一人一票會發生乜問題。我將成件事推到最簡單,如果一個港大人同一個嶺南人爭秘書長位,邊個會贏?九成係港大啦。唔係因為港大人特別叻吸到票,而係因為港大有二萬幾個學生而嶺南得二千幾人。大家起點差成十倍,係咪真係公平呢?我唔識講。但我相信經過呢半年嘅爭議,大家都知一人一票未必就等於公平。今次個問題唔喺提名權度,而係會員本身已經係不自由地隸屬唔同嘅團體。自己團體會投返自己團體以獲取最大利益,是常識吧?3.學聯同學生會權力模式我當大家好大方任由港大可以喺一人一票中連年勝出,甚至細院校組成聯盟抗衡劣勢。咁當學聯真係由一人一票投出嚟嘅時候,如果佢哋同學生會嘅決定有矛盾,聽邊個好?你中大學生會由萬幾人選出嚟?收皮啦,我學聯代表十萬大學生,你憑乜影響我決定?如果依退聯組嘅講法,佢哋提倡嘅改革就正正會帶嚟佢哋依家指責緊學聯嘅嘢 – 架空咗學生會本身嘅代表性。諗吓美國嘅參議院點解唔係全美國人一人一票普選而係每個州各自選兩個人,就會明白各個院校保持各有代表嘅重要性。而呢個亦都係美國總統係用選舉人票而唔係一人一票嘅原因。因為一人一票嘅話,各個州嘅獨立性就會蕩然無存。4.決策問責如果退聯組認為學聯決定同港大學生會不乎,點解唔係要梁麗幗或者周永康出嚟解釋而係諗住退聯?甚至如果覺得學聯決策失誤嘅,咪彈劾秘書處或者學生會囉。郁啲就話退出,究竟係諗住逃避問題定解決問題?5.退聯組,俾啲大志我明白small is beautiful,但我哋係搞緊群眾運動,唔係孤芳自賞。如果唔信群眾,又何必爭取普選?學聯個機制唔見得咁難打入,只要選贏學生會就得啦。如果相信自己嘅決定比其他人嘅有智慧,點解唔嘗試先爭取支持佔領學聯?(之後又實有人話點解唔爭取支持佔領政府嚟反駁我㗎啦,我諗唔洗我分析埋學聯體制同依家政府嘅差異啩?)真心講,港大係有光環,但學聯代表性更強。群眾運動唔用盡辦法代表多啲人,其實係無牙力展示實力討價還價嘅。係為本土派好嘅,騎劫學聯係最快捷宣揚本土理念嘅方法。6.退聯之後好啦,我當你真係咁把砲退到聯,咁又點執行之後嘅大學聯盟行動呢?定期開會,有共識嘅議題會用聯盟嘅名義運作,咁同學聯有乜分別?如果你話唔會定期開會,要有啲大議題先會嘗試組織聯盟嘅,請恕小弟並不苟同。有啲大學生未必太關心嘅事件,好似碼頭工人罷工咁,學聯都有幫手嘅。如果要用個別學生會名義,仲會唔會有人去做,又或者力度會唔會咁大呢?我好懷疑。即係咁,如果港大學生會去支持碼頭工人罷工我哋會覺得好怪,但學聯去做就無問題。因為大家理論上嘅政綱同服務目標都唔同。7.學聯改革而最後,我係支持學聯由呢一刻立刻開始改革,參考退聯組某些嘅建議,建立一個更透明嘅制度。一個更進步嘅制度係要大家共同去創造嘅。大家後生仔講道理其實有計傾嘅,又何必吓吓都要杯葛呢?原文載於作者FB,標題為編輯所擬 學聯

詳情

陳澤滔:如果學聯真的由學生一人一票選出……

睇到周永康嘅status,突然又想講吓退聯。其實一直都唔太想講,因為家陣啲人好麻煩,一唔撐就話你左膠,講兩句唔啱聽嘅就唔會再講道理,甚至話你堅持講道理呢個行為本身已經係左膠。先旨聲明,我唔支持退聯,但我極贊成有多啲退聯嘅討論。真理愈辯愈明,而且學聯亦都要確實地面對學生嘅期望。能力愈大,責任愈大。因為大人嘅不濟,好不幸我哋將一個唔應該由學生負起嘅重擔放咗去學聯嘅同學仔上。我會覺得有時唔應該對佢哋太harsh,但正如佢哋所講,作為時代選中嘅年青人,佢哋亦都要誠實地面對佢哋嘅處境。因為懶,以下落嚟會用point form:1.唔好吓吓話人係鬼呢個對兩方支持者都係咁講,特別係支持學聯果邊。唔見得嗌退聯就係鬼,而無真憑實據之下更加唔好隨便話人係鬼。係有道理嘅,講道理咪得囉。咁多時間俾大家討論,何必搬一套只問立場嘅價值觀出嚟?2.學聯組成問題退聯組一直講嘅係學聯秘書處唔係由學生一人一票選出嚟,無資格代表學生。我先唔討論秘書處嘅代表其實嚟自學生一人一票嘅學生會,我講吓學聯如果一人一票會發生乜問題。我將成件事推到最簡單,如果一個港大人同一個嶺南人爭秘書長位,邊個會贏?九成係港大啦。唔係因為港大人特別叻吸到票,而係因為港大有二萬幾個學生而嶺南得二千幾人。大家起點差成十倍,係咪真係公平呢?我唔識講。但我相信經過呢半年嘅爭議,大家都知一人一票未必就等於公平。今次個問題唔喺提名權度,而係會員本身已經係不自由地隸屬唔同嘅團體。自己團體會投返自己團體以獲取最大利益,是常識吧?3.學聯同學生會權力模式我當大家好大方任由港大可以喺一人一票中連年勝出,甚至細院校組成聯盟抗衡劣勢。咁當學聯真係由一人一票投出嚟嘅時候,如果佢哋同學生會嘅決定有矛盾,聽邊個好?你中大學生會由萬幾人選出嚟?收皮啦,我學聯代表十萬大學生,你憑乜影響我決定?如果依退聯組嘅講法,佢哋提倡嘅改革就正正會帶嚟佢哋依家指責緊學聯嘅嘢 – 架空咗學生會本身嘅代表性。諗吓美國嘅參議院點解唔係全美國人一人一票普選而係每個州各自選兩個人,就會明白各個院校保持各有代表嘅重要性。而呢個亦都係美國總統係用選舉人票而唔係一人一票嘅原因。因為一人一票嘅話,各個州嘅獨立性就會蕩然無存。4.決策問責如果退聯組認為學聯決定同港大學生會不乎,點解唔係要梁麗幗或者周永康出嚟解釋而係諗住退聯?甚至如果覺得學聯決策失誤嘅,咪彈劾秘書處或者學生會囉。郁啲就話退出,究竟係諗住逃避問題定解決問題?5.退聯組,俾啲大志我明白small is beautiful,但我哋係搞緊群眾運動,唔係孤芳自賞。如果唔信群眾,又何必爭取普選?學聯個機制唔見得咁難打入,只要選贏學生會就得啦。如果相信自己嘅決定比其他人嘅有智慧,點解唔嘗試先爭取支持佔領學聯?(之後又實有人話點解唔爭取支持佔領政府嚟反駁我㗎啦,我諗唔洗我分析埋學聯體制同依家政府嘅差異啩?)真心講,港大係有光環,但學聯代表性更強。群眾運動唔用盡辦法代表多啲人,其實係無牙力展示實力討價還價嘅。係為本土派好嘅,騎劫學聯係最快捷宣揚本土理念嘅方法。6.退聯之後好啦,我當你真係咁把砲退到聯,咁又點執行之後嘅大學聯盟行動呢?定期開會,有共識嘅議題會用聯盟嘅名義運作,咁同學聯有乜分別?如果你話唔會定期開會,要有啲大議題先會嘗試組織聯盟嘅,請恕小弟並不苟同。有啲大學生未必太關心嘅事件,好似碼頭工人罷工咁,學聯都有幫手嘅。如果要用個別學生會名義,仲會唔會有人去做,又或者力度會唔會咁大呢?我好懷疑。即係咁,如果港大學生會去支持碼頭工人罷工我哋會覺得好怪,但學聯去做就無問題。因為大家理論上嘅政綱同服務目標都唔同。7.學聯改革而最後,我係支持學聯由呢一刻立刻開始改革,參考退聯組某些嘅建議,建立一個更透明嘅制度。一個更進步嘅制度係要大家共同去創造嘅。大家後生仔講道理其實有計傾嘅,又何必吓吓都要杯葛呢?原文載於作者FB,標題為編輯所擬 學聯

詳情

陳澤滔:行動升級的那一夜

十一月三十日猶豫咗好耐應唔應該打唔打關於呢一日嘅故事,但我見大家對件事嘅關注,同件事本身嘅嚴重性好似完全唔平衡咁。唔知大家係咪已經麻木咗。或者我嘗試分享一下我當日嘅所見所聞,希望可以還原返部分嘅畫面。我嘗試打短少少。因為雙學嘅吹雞,我六點鐘就去咗金鐘。當時真係好少人好少人,我好明白,「大學生遲半個鐘是常識吧。」其實個大台真係好嘈,我真係想問好耐,點解要放個大台係自修室隔離?希望呢班學生第時做官時城市規劃會好少少。而一班莘莘學子又真係體現到香港人嘅學習精神,完全話到俾大家聽乜係”艱險我奮進”,係幾惡劣嘅環境下都溫到書做到功課。而有班有戀台情意結嘅人同一班拆台情意結嘅人鬥爭更加係匪夷所思。講真其實無乜人理個大台,我都唔明咁在意做乜。而如果真係有班淨係聽大台話嘅人存在嘅話,亦都唔見得佢哋有能力幫你守龍和道。結論就係我都唔知佢哋爭乜Q。咁又講返件事,六點鐘就俾學聯講到九點鐘,人先開始多起上嚟,如果孫中山搵呢班友革命就真係搞一萬年都未搞得成。九成時間都無聽佢哋講乜,睇facebook 見黃之鋒去咗立法會仲妄想佢會無啦啦走出嚟開門叫大家入去,睇嚟我都真係太天真。當宣佈行動果一刻,其實大家都好靜。我唔知可以用乜形容詞去形容大家嘅眼神,我腦入面淨係有呢四個字──易水悲歌。我諗大家見到個人數都覺得唔樂觀,但同時大家亦都明白,有啲事情係不得不做嘅。知其不可而為之,係固執,係使命,係責任。你哋可能會笑我哋年少氣盛,不知進退。但其實,我已經唔知道可以退去邊度。泛民話要去社區散播民主種子。我真係好想問,乜去社區散播民主種子唔係你哋政黨一直要做嘅事嚟嘅咩?做乜依家又要我哋幫埋你散播民主種子?呢幾十年你哋散咗啲咩種子?現場比較令我驚訝嘅係有班婆婆同師奶坐咗係側面。一直以為升級係後生女嘅專利,估唔到都有年長一輩嘅人支持。(會唔會俾人話我性騷擾?) 雖然佢哋未必有能力上前線,但起碼令我哋知道,係抗爭嘅路途上面,我哋並唔係得一班年輕人孤身作戰。之後一嘢就衝咗去添馬公園,基本上我一去到嘅時候,條通去政總嘅樓梯就已經堆滿咗人。大家不斷叫「開路開路」,好似警察真係會俾我哋嘅誠意打動咁樣。我係後面跟住叫咗幾分鐘,叫叫吓我都覺得唔係好對路,樓梯太危險亦都唔希望呢個位有啲咩衝擊,所以就走咗去立法會果邊睇吓有乜幫到手。如果你話雙學其實都無乜計劃點去衝擊,我會講佢應該真係唔想有啲暴力嘅衝突,佢哋應該係計劃用人數包圍政總,可惜號召力始終未夠。之後就係「一、二、三、衝!」嘅現場,其實我唔明數一二三有乜問題,或者要考慮下 「蔣、麗、芸、衝!」可能會得民心啲。示威者攞住幾把遮,幾個紙皮盾呢啲所謂嘅攻擊性武器去衝擊警方嘅防線。其實物資真係唔係幾夠,根本係血肉之軀擋警棍咁濟。前排嘅中椒嘅中椒,穿頭嘅穿頭,幾百個示威者就係用佢哋可笑嘅裝備去同十幾個警察搏鬥。你可能會覺得笑佢哋蠢,你可能會覺得佢哋抵死,但我只可以講,佢哋其實為咗得到市民虛無嘅認同,已經放棄咗好多有靠方法去保護自己,最後就只淨返用自己嘅軀殼自己嘅人身安全去為大家爭取大家應該一早應該擁有嘅權利。我傳一個畫咗隻熊仔嘅軟墊盾上前線嘅時候,我好想笑,但我喊咗。衝多幾次都係失敗,有更多嘅人受傷,之後就係漫長嘅對峙。其實係非常之無助。人明明係有好多,但衝唔過就係衝唔過。直至後面有人不斷叫「龍和道!」先知道政總對出嘅馬路已經俾示威者突破咗。即刻放棄對峙去增援,現場已經有示威者搬緊鐵馬佈防。又話說有示威者將三個鐵馬紮成三角再倒轉放,希望用嚟衝擊。呢個係韓農當年教嘅,真係無堅不摧,仲令網民恥笑咗香港警察好耐,因為佢哋連衝擊工具都提供埋俾人。但最後衝擊三角陣都係俾人勸止咗,拆咗佢用嚟封路。有高登仔嘅講法話即係有坦克但唔用,拆咗佢嚟當物資擋路。大家自行判斷是非對錯。突然有支水成支火箭咁係我身邊擦過。其實由928 開始我次次見到有人掉嘢我都嘗試去叫停,但去到今時今日,我自己都好疑惑仲應唔應該阻止啲人繼續掉。睇見身邊咁多人頭破血流,睇見咁多無理拘捕同虐打,你好難去說服自己或者其他戰友點解唔還擊。老實講,麻木咗。原來唔掉又唔見得警察唔會衝過嚟打,即使你幾冷靜幾克制佢哋都係衝上嚟照扑。咁可以點?我唔知。所以我講咗句…「屌你!差啲掉到我呀仆街!」其實現場係有太多花生友,淨係企係公園果邊睇戲。我唔知應唔應該當佢哋係抗爭者,因為氹細路咁氹都叫唔到佢哋一齊落馬路。但我尊重每一個係現場支持我哋嘅朋友,可能大家嘅包袱唔同,但大家嘅目標係一致。花生又好,勇武又好,只要唔洗俾鑊其他人揹就ok。而學聯亦都同激進示威者時有爭拗,因為有人唔同意唔衝擊政總。或者有人會覺得示威者成日自己嘈嘈嘈,但其實我覺得呢個先係後生仔嘅溝通方式。唔盲從,有其他意見就會講,唔理你係雙學乜乜乜,講咗先,再睇吓有無人支持。而我亦都欣賞雙學嘅朋友,相比起所謂嘅大台,佢哋更有面對批評嘅胸襟。而其實呢個就係網上討論嘅模式。呢個係年青人嘅模式。值得一提嘅係樓梯位依然係無郁過。我唔知佢哋仲有無叫「開路」,意志力真係好重要。之後行開咗去運物資(原諒我skip 呢part,唔可以透露太多,我都唔知打完呢篇嘢之後會唔會俾人拉),點知一走咗佢就清場!我一返到已經係好似災難現場咁,幾步就一個傷者。有啲頭破血流,有啲傷咗手手腳腳,有啲傷者直情暈暈哋,由有車嘅叔叔送佢去醫院。其實我係完全想像唔到點解有人會咁狠心咁樣扑落啲普通市民頭上。我唔識得點評論咩係最低武力,因為點睇要對付一個攞住盾牌戴住頭盔但唔會還擊嘅人,警棍扑頭點都唔係最適合做法。我有諗過點解警察會打得咁狠,最大可能係佢哋覺得好威。一個特別成立嘅小組,覺得自己係精英中嘅精英,所以出手就要殺個血流成河。唔好意思,用咁嘅裝備去對付一班手無寸鐵嘅學生,仲覺得自己好威嘅,我只可以用兩個字形容──懦夫。我唔知警察通例點寫,有人話可以用高一級嘅武力,咁攞紙皮盾牌嘅高一級武力係乜?我嘅淺見就係攞一個膠盾牌大佢個紙盾牌啦,示威者用盾牌推你你咪用盾牌推返佢囉,你哋日練夜練唔係輸啩。不過當然警察通例唔會咁寫啦,警察通例甚至唔會寫如果有過千人過萬人反抗時應該點用,更加唔會寫如果有班人俾人拉完又返嚟一路拉一路愈嚟愈多人咁點算。佢唔會教你用武力嚇走佢哋。因為寫警例果條友好清楚,如果真係有咁多人有咁嘅信念咁堅持嘅話,咁呢個一定係一個政治問題而唔係治安問題。警察完全無需要為政府嘅行政失當負任何責任,警員亦都唔應該上前線為政府官員揹黑鑊。如果你係警察,你希望嘅係維持治安嘅話,請再三諗清楚自己做緊乜,諗清楚上頭嘅order 究竟真係想維持治安,定係推緊香港去一個萬劫不復嘅境地?班示威者係啲乜人,佢哋暴唔暴力,我諗前線嘅警察對咗兩個月應該比更多人更清楚。示威者真係想傷人?佢哋真係好暴力?咁我相信好多次警察落單咗都唔可能全身而退。當然你都可以話有班示威者真係好暴力,你又可以話打人果班警察唔係我唔好賴我。但講得呢兩句本身已經相當矛盾,俾人打果個都唔見得係暴力果個。我有時諗,究竟警察有無朋友嘅呢?警察啲仔女又會點諗呢件事呢?你打緊果個,可能中學時大學時曾經嘅老死,大家一齊踢過波,一齊係學校搗蛋過。又想像下十年之後,個仔女開始大個,問返起你果陣時有無打學生,你會點答佢呢?你會堅持你打嘅係壞人?你點面對網上圖文並茂嘅資料?你真係覺得自己啱哂,啲示威者錯哂?唔想再講警察嘅問題,我只係想勸仲有少少良心嘅警察,攞少少勇氣出嚟。保護市民,做你應該做嘅事。(我相信又會有人話我「仲信有好警察?!左膠!」,唔知架,試下囉,勸到一個已經係bonus)講返現場,我相信成晚受傷嘅示威者超過一百人,當然主流媒體係唔會有報導架啦。而呢筆帳香港人係會計落所有嘅香港警察度。已經唔係面唔面對政權嘅問題,而係暴力同良知嘅問題。見乜都幫唔到,睇個勢又似會膠著一晚,就諗住返去營訓覺。最主要原因係之前果晚鳩烏到四點幾,諗住可以消耗下啲警力,點知原來係消耗自己嘅體力。行返去嘅時候好似又聽到人叫拆大台,救命。個大台嘅作用就係行動失敗嘅時候攞嚟賴架嘛,點可以拆呢?唉,唔理,大台班友都唔值得幫,你哋鍾意點就點。係營睇咗陣新聞又話警察搬啲磚出嚟抹黑,都無佢咁好氣就訓啦,點知一合埋眼出面就吹雞,又話佔領咗龍和道!我心諗唔撚係呀嘛,唔通真係有美國隊長?行出去途中又聽到物資站有爭執,依家都唔攞眼罩頭盔出去唔通真係留嚟拜山用咩?我睇唔通,雖然眼罩攞去拜山其實應該真係work。但係我問攞嘅時候又好爽快喎,可能一個個物資站唔同。我問果個係大名鼎鼎嘅糾察長,咁爽快都俾返少少credit 佢(只係實話實說,講真我極唔滿意所謂糾察面對批評時嘅態度)。其實個個佔領者都係心大心細,明知係伏但又唔甘心俾警方大到,唯有見步行步,佔住先。行行下竟然又真係有堆磚!唔係伏到咁呀?!而班後生仔就真係拗緊應唔應該掉磚。有啲就話「見到咁多人受傷唔係唔反擊呀?」;有啲就覺得似係陷阱;我自己就覺得咁大舊磚你真係咪掉中自己人,我就一定行開先嘞。拗咗陣最後又係攞咗啲磚嚟整路障,我諗即使執到支AK47 最後應該都係逃唔過做路障嘅命運。不過依家睇返成件事,我嘅愚見就係警察知打得太狠所以諗住搵返啲嘢嚟屈你班友做暴民,咁就解釋得到點解佢哋清完場洗哂地都要撤走。而依家屈唔到就要求傳媒低調處理示威者受傷人數眾多呢個問題。睇見個個坐哂係龍和道但大家同時又十分拗底,其實真係唔知想點。我自己就忽發奇想「如果大家突然轉MODE,個個坐定定等拉,咁圍堵政總係真係會成功架喎」。當然我係唔會講出嚟,因為我真係唔靚仔,唔想我個樣出現係提防左膠果張POSTER 度,而且俾幾千人鬧左膠嘅感覺應該就唔係幾好受。等下等下實在太凍,諗諗下橫掂都俾人清不如依家返營訓(我認我係衰仔…)。點知一返到營又吹雞,唔知邊度啲警察衝哂入嚟,好似要全清金鐘咁樣。屌,我攰到仆街呀!死死哋氣又去返立法會道,其實多我一個唔多,不過真係無理由見佢清金鐘都去訓覺架?訓訓下俾人夾咗上垃圾車咪弊!係中信門口班警察真係小學雞之最,竟然係度同班後生仔係度鬥嗌「你過嚟呀!」,個情形就好似兩個古惑仔隔條彌敦道鬥叫「過嚟打我呀!」,真係不堪入目。另一面班警察又衝下又退下咁我都唔知佢哋做乜鳩,既然有能力清場嘅做乜唔清?呢個政府做啲嘢簡直係非人類所能理解。見個情況開始穩定落嚟,班友仔彈出彈入點睇都唔似今日會清金鐘,我又心思思想去訓覺。當時已經得返一個鐘訓,但我真係頂唔順,對唔住呀戰友!點知一入到個營,又!吹!雞!仆你個街,唔怪得個個都話要拆大台,我都想!今次係添馬橋,啲路障俾人清咗,又叫人攞嘢上去防喎。老實講我都唔知可以點防,班警察以今時今日嘅暴戾程度,邊有得守。但天真嘅我都係走咗上去搬鐵馬,唉。之後就唔講啦,都係一衝就散咁啦。最奇特係佢哋清完之後竟然自己拍手掌!呢個動作其實同自己打完個status 之後自己Like 返差唔多,做親呢個動作嘅人士一律會俾我標籤為精神病患者,勸大家就唔好試啦。跟住佢哋仲衝咗落嚟拆醫護站,我就一定唔會得罪醫護人員嘅,同個幫自己打針嘅人結怨簡直係搵自己條命較飛。我唔知班警察有乜咁把炮,但以我所知有好多做政府醫院嘅人係醫護站幫手,我就希望班警察永世都唔會受傷啦。不過我相信佢哋都係專業嘅,應該就唔會公報私仇,不過受氣嘅嘢啦喎…我會建議警察求診嘅時候唔好表明身份。打打下班警察又退返,然後企係天橋恥笑啲示威者。我心諗你哋又真係夠POP 喎,鼎鼎大名嘅高登起底組你哋竟然唔驚?你哋查案有時都要上高登搵料。拋頭露面嘅下場只會係俾人人肉搜尋,唔通班友真係無朋友嘅?「高登見!」 班友真係走咗!班友真係走咗!OK,我認我係自high,因為我叫得好細聲佢哋應該聽唔到。但有幾個最後真係喺高登見返!我唔鼓勵網絡欺凌,不過分享下人哋嘅真實故事啦喎…夠鐘,咁嘅情況留係度都無乜用,無理由又攞no pay leave 架嘛,所以我就返咗公司。manager 見到我個樣就嚟死咁濟竟然叫我入lab 訓一陣。而我果一陣去到… 下晝六點,多謝哂。我唔知仲可以做啲乜去令大家關注當晚發生過嘅事,警權過大係一個問題,警察濫用暴力更加係一個問題。今日大家可能覺得件事太煩唔想再理,但唔出聲只係默許佢哋繼續呢啲行為。好老套果句,當日其他人俾人恰而我無出聲,今日到我俾人恰,再無人有能力出聲啦。天祐香港(我諗唔係好長… 啩。希望有人睇啦。)原文載於作者網誌 佔領

詳情