Terence Yun:《東張西望》為咗賣廣告可以去到幾盡?

TVB首席維穩節目《東張西望》可說是TVB最具影響力的電視節目,因為是播放在合家歡時間,又以軟性手法報導,阿媽師奶輩最受落,甚至比六點半新聞報導更有影響力。所以這麼多年來這類型節目永遠有市場,且歷久不衰,即使個名改了又改,仍然存在。

一路以來《東張西望》就是TVB的私器,如在電視發牌事件上便透過這節目作出反擊,當年碼頭工潮時,又找碼頭公司解釋以消除外界批評,但卻沒有找勞方訪問。這些手法一直被指是公器私用,所謂軟性新聞,其實也只是利益為依歸。

昨晚(7月4日)《東張西望》又獻新猷,講述將軍澳的空氣如何差,對身體有不良影響,特別是在做戶外運動時,影響更大。節目又找來兩名所謂的市民做訪問,但市民的打扮明顯化行妝,跑步都化妝咁有型?之後又找個所謂專家講將軍澳空氣質素問題嚴重,再一個轉身就拍了一個健身室,然後就指在室內跑步便少了這些問題。「報道」最後說室內也有其他風險云云,但只是輕輕帶過。這時候重點終於出現:就是那間健身室的招牌,到了最後節目尾段roll廣告贊助,當中寫著同一間健身室logo,整個謎團終於解開。

這間健身室何方神聖?咁把炮可以在黃金時段賣廣告?咪就係侯佳‧玉瑩囉。邊個侯佳‧玉瑩?細細粒呀?咪就係以前叫黎姿,現在貴為上市公司主席黎珈而囉。TVB契女再加上強大後台,喺度賣廣告唔出奇啦。

但係電視台賣還賣,係咪要咁樣做報道呢?講到喺將軍澳戶外運動好恐佈咁,隨時就死咁款,唔好咁樣嚇人啦。將軍澳都有唔少戶外運動場地,咁係咪唔使用呢?將軍澳幾十萬人喺度居住,係咪要搞到全城恐慌?咁樣係咪會讓你間健身室有多些生意?做生意都唔係咁樣做。老實講,呢個健身室又有冇做足空氣質素檢定?個冷氣糟係咪有成日清潔?冷氣糟有幾不潔,大家唔係唔知啦,你節目又有冇講呀?

TVB你生意唔好,深感遺憾,連直播平台Big Big Channel都撈埋我都明,同大陸網站合資搞網劇亦明白,呢種叫做開源,這是做生意正常不過的事情。但是你為左個廣告就去到呢個地步,不惜恐嚇市民去賣產品,係咪真係咁嚴峻? 你自己個電視城都喺將軍澳呀,你成日叫藝員拍外景,係咪想害死員工呀?到時員工有咩問題,係咪可以用你呢條報導做證據呀?因住報應呀。

原文載於作者網誌